Menulis Puisi Bali
Karma Phala
Atma numadi di gumi
Kaiket karma wesana
Ané nutug makudang
palekadan
Saking lata, janggama,
sato miwah jadma
Atmané engsap ring jati
mula
Wiréh kaliput maya sira
tattwa
Dadi manusa palekadan
sané utama
Karma phala anggé sarana nulungin
raga
Nulungin kauripan saking
samsara
Wénten tatiga bacakan
karma
Sancita, Prarabdha, lan
Kryamana
Wénten phala sané katami
saking lintang
Wénten karma sané kakardi
mangkin katami mangkin
Wénten karma ané kakardi
mangkin katami ring panumadi benjang
Elingan cening cakepan
karma phala punika
Uripé wantah lelintihan
atma nyalanang samsara
Numadi tankadi-kadi
mangda manunggal ring sangkan paraning dumadi
Jan 2021
Panca Maha Bhuta
Iraga lekad malalung
Madasar Panca Maha Bhuta
Ané ngardi rupa lan guna
Apah, Téja, Bayu, Akasa
lan Pertiwi
Ngatut sang atma maprekérti
Saking Apah iraga malajah
Mulang lampah tan
mapi-mapi
Satata ngasor nututin
lebah
Sakadi rah sakadi tukad
Ngembahin merta maurip
Saking Teja iraga malajah
Nibakin api ngabar-ngabar
Satata nyujur ka luur
Ngalebur sahananing ala
Sakadi api ring garba api
ring bumi
Saking Bayu iraga malajah
Nabdabin angin ngasirsir
Nayuhin ngetisin kosek
Sakadi prana sakadi angin
Nguripin sarwa maurip
Saking akasa iraga
malajah
Idupé sujatiné puyung
Langit puyung, tangkah
puyung
Saking puyung sida
kadagingin
Ngalingkupin sarwa sakala
niskala
Saking Pertiwi iraga
malajah
Ngupapira sarwa sarana
Ring angga ring bhuana
Jalarang iraga makardi
Manggihin moksa lan
jagadhita
Januari 2021
Sad
Ripu
Mesehé masaih
Meséh masiliban
Tongosné tan madoh
Masusupan ring ati
Rikala ripuné mamurti
Kenéhe momo ngarapu
Matsarya ngaraksa
Krodhané ngarubéda
Kaoné kayunin
Solahé suluhin
Slikisikin saka siki
Apang mesehé sami somia
peb 2020
Sapta
Timira
Kaliput peteng sintru
Benéh pelihe dadi saru
Parilaksana tanpa sepat siku
Sakadi tan maguru
Maseteru paturu satru
Makanti momone di malu
Mamokak pada jumbuh
Timira ing tengahing dalu
Manados jalu ngenain ampru
nov 2019
Biodata
I
Nyoman Sutarjana embas ring Gianyar, Bali tanggal 21
September 1986 makarya dados guru ring SMA Negeri Bali Mandara. Meled nulis
sastra Bali modern sangkanin piteket Ajik Weda Sanjaya lan Bapak Raka Kusuma.
Sajaba nulis ipun madue hobi ngalukis, masepedan, lan koleksi mainan. Ipun
sampun madue pianak mawasta Ni Putu Ghneya Nayara Iswari sane dados inspirasi
tulisane. Media sane sampun ngunggahang tulisane inggih punika Pos Bali lan
Suara Saking Bali. Ipun dados kahubungin ring email sutarjana21@gmail.com
