Imsomnia
Mula
cocok Wayan Subagia kasengguh playboy uyeng-uyengan. Sirahne uyeng-uyengan yen
tusing maan maekin anak luh. Suba liu anak luh ane kauberin, uli ane pramenak
nganti ane jaba utawi biasa. Uli ane masebeng cara Dek Ulik kanti cara luh Cablek.
Prinsipne besik. Ia dot nuutin satua Baline. Buka raja di satua Ni Diah Tantri.
Ia dot ngelah tunangan kanti panyatusan. Sabilang peteng minimal ada ane
ngorahang “Met bobo, mimpi indah ya!”. Yen sing keto sinah pesu uyangne,
ngantos uyeng-uyengan.
Dugas
cerik Wayan Subagia maan nongos di Panti Asuhan. Ia anak cerik padidina ditu,
ento makada liu ane ngarunguang ia. Mbok-mbokne demen nginepin ia, sawireh
petengne Wayan Subagia kereng ngeling. Memene ane ngalekadang ia las, ninggalin
ia mawadah kardus misi aled alembar, tur kertas putih ane matulisan DTR. Ngangsan
kelih ia demen katuturin satua satonden sirep. Bu Oka, pemilik pantine demenin
nuturin ia cerita Tantri. Miribang unduke ento ane ngaenang Wayan Subagia cara
jani. Satata nguberin anak luh ane bisa nuturin ia.
“Mara
jani tiang ngarasayang tresna Luh.” Keto Wayan Subagia mamunyi sareng anak Luh
sambilanga mabalih odong-odong.
“Bli,
tiang suba janda bli. Adi enu nguberin tiang. Seken tresna nika?” Keto Luh Atik
mamunyi, unduke ia maan dadi waitress kafe makada suba biasa ia ningeh munyi
buka keto.
“Luh
ane ngae keneh bline dedeg. Sabilang peteng bli satata ngacep iluh apang sirep
bline luung. Miriban suba jodoh bline matemu iluh. Diastun janda, janda selalu
di depan. Keto anake ngorahang.”
“Tiang
suba ngarasayang gagal berumahtangga bli. Tiang dot masih I Gede maan rerama
ane seken. Dumadak bli mula seken kenehne buka munyine. Nah, jani jalan
bareng-bareng ngalih ubad anggo ngilangin insomnia bline.
Sasubane
pesu uli panti asuhan. Ia bekelina buku indik raja Eswaryadala teken ibu
pantine. Sweca widhi ia katerima dadi pegawe bank ulian ijazah sarjana
ekonomine. Wayan Subagia nyalanang hidupne padidi. Ngidup-ngidupan dewek padidi.
Nanging kenehne enu puyung. Puyung ane tusing ngidang ban ngengkebang. Tusing
ada ane ngidang ngisinin.
Sabilang
peteng Wayan satata uyang. Manahne tusing sida ban ngundukang. Uyang pasarene.
Suba pang keti ia maganti gaya. Glalak glilik, glibag-glibeg, budang-bading,
maplingseran. Nanging paningalane tusing bisa kidemang. Di ngidange sirep
akresipan, ia ipit geleh, buka guggul memedi, lantas ngedat tusing sirep kanti
lemah.
Tusing
bisa ngundukang apa ane makada buka keto. Yen ulian kuang banten. Uli cerik
suba pragat ia maan banten, uli cerik ngantos menek kelih. Bu Oka masih suba
ngaenang banten piutangan dumadi, banten bayuan, lan ajaka melukat di gria. Bu
Oka ane nyayangin ia, buka anakne padidi. Ngingetin ento kanti pesu yeh
paningalane Wayan Subagia.
Buin
manine ia nyinggahin panti asuhan. Tur ngubadin rasa kangene. Matemu sareng
timpal-timpal lan mbok pengasuhne. Tusing engsap ia meli amik-amikan baanga
adi-adine di panti. Ditu ia kasambut cara tamiune. Ditu masih nepukin kenyem
mbok pengasuhne sareng Bu Oka. Lega kenehne Wayan Subagia.
“Iseng
gati tiang matemu sareng Ibu. Ibu sane nyayangan tiang. Diastun tiang tusing
ngrasayang tresna meme. Unduke punika tusing rasayang tiang. Ibu rumasat meme
gelah tiange.” Keto Wayan Subagia mamunyi sambilanga ngengkebang jengisne.
“Ibu
masih demen Wayan nglalinin mai. Nak sujatine baat keneh ibu, ngalebang Wayan
uli panti. Nanging risubane wayan polih magae di bank. Ane makada Wayan suba
bisa madan mandiri, suba bisa ngidupin padidi. Ibu rumasat meme sekala ceninge.
Tuturang apa ane baat kenehang Wayan, eda ngengkeb-ngengkebang.”
“Ibu,
sujatine tiang dot nawang paundukan tiang. Diastun tiang nawang reraman tiang
ngutang tiang. Sujatine tiang dot nawang unduk reraman tiang. Ento ane dadi
beban keneh tiange bu.”
“Aksamang
Wayan. Legaang keneh Wayane. Pinehin masih pajalan meme wayane. Wantah wenten
ane ngawinan ia malaksana buka keto. Dugas dinane ia nitipin Wayan. Ia nuturang
tusing las ngulungan belingan. Ia sayang teken ragan Wayan. Nanging ia tusng
ngelah pilihan. Liu ane bakat kenehanga unduk kluwargane saking tri wangsa,,
unduke ia ane enu masekolah.”
“Miribang
ene suba karma tiang. Tiang dot nawang unduke ene, miriban ene ane ngaenang
tiang tusing ngidang sirep. Mangkin tiang mautsaha nerima unduke Bu. Miribang
tiang mula tusing maaji, tiang ane ngae cemer kluwargane. Wireh tiang anak
astra.”
“Boya
nika manten. Apang Wayan bisa nerima masih sebet memene. Memen wayan nak
kaparikosa sareng timpal-timpal dugas acara perpisahan kelasne. Ditu memen
ceninge gaena apang mabuk, engsap teken raga.”
Makesyab
Wayan Subagia ningeh munyi ibu pantine. Batise nadak ngetor, engsek tangkahe,
tan sanggup majujuk, ia nyleleg maangsegan di sakane. Tusing madaya sebet ane
rasanga memene rikala ngadut dewekne. Tusing karasang sebetne. Engken engsekne
saabilang peteng, ngaba belingan saking jatma corah. Gedeg macampur sebet.
Buina ngenehang kluawargane pasti suba nesek ia apang ngulungin belingan.
Nanging ia tetep kukuh, nyaga manik ngantos sida kalekadang. Ulian ia sayang
teken dewekne,
Jani
ilang sebetne Wayan Subagia. Buka guleme ungkabang, galang rasayang kenehne.
Jani mara ia las, nerima unduk palekadane. Suba lasya maserah ane suba liwat.
Suba tusiang kal dadiang sebet keneh. Tangkahne rasayang ingen, ulian baat
tangkah suba tastas ulung.
Wayan
Subagia magae sekadi biasa. Kenehne seken jagi nglanturang hubungan sareng Luh
Atik. Luh Atik ngicen tresna buka memene. Hidupne ane karasayang buka nyujuh
lawat memene. Suba rasayang tegep. Ulian maan tresna lan perhatian saking Luh
Atik. Luh Atik bisa nuturin Wayan Subagia, ane makada solahne masalin. Seleg ia
megae di bank. Tusing buin demen nyeledet anak luh. Seleg magae. Kenehne lakar
munduhang biaya masakapan. Bu Oka masih suba bisa nerima kenehne. Diastuan maan
makesiab.
Luh
Atik ane ngaenang anak cerik di tengah awakne Wayan Subagia jemet. Ring
psikologi kocap inner child. Bagian Wayan Subagia ane tusing maan tresna
meme. Bagian saking masa lalu Wayan Subagia ane tusing maan tresna. Ane bedak
pabaane usud-usudan meme. Ane satata ipit, geleh tur ngajap-ngajap meme. Luh
Atik ane ngaenang imsonia wayan Subagia sayan ilang.
Rikala
seleg megae. Wayan Subagia maan pelanggan ane soleh. Uli panganggone sinah
pelanggane ento sulinggih. Wireh mabaju sarwa putih. Tur nganggo tungked.
Palanggane jagi ngambil uang pensiunan rabine. Mara Wayan Subagia nakonang
adane. Dayu Tri Rahmawati keto atur sulinggihe. Makesiab tangkahne Wayan
Subagia, edas ia macepol pingsan.