Luh Puji

 

Tiang matemu malih sareng ragané, rikala awakné karurub api ring acara pengutangané. Tusing cingakin tiang kéngkén semu ragané. Napi sebet? Napi lega? Napi sampun las ninggalin tiang? Apiné lan andus sané makudus ngengkebang makejang éngkén kasujatian semun sawané. Wantah ngaap ané rasayang di tangkahé. Ngaap tur jengah.  Timpal ané sungkemin tiang ngemasin padem. Anaké ngorahang ia buduh. Tiang tusing percaya.

Luh Pujiani keto anake nyambat, buka adané Luh Puji satata kapuji-puji, satata kasumbung. Timpal raket tiang dugase enu masekolah SMA. Di kelas satata négak paling simalu, menékang lima satata simalu, ngumpul tugas masih simalu. Satata maan juara satu.  Tusing kena ban ngundukang, jani ia ngalin tiang masih paling si malu. Ngalain ulian ulah pati. Nyabut angkiané padidi.

Di kelas tiang négak paling siduri. Luh Puji ané satata ngedeng liman tiangé apang nyak maju. “Iraga anak luh harus semangat, eda nyak kalah tekén anak muani.” Keto ia nuturin tiang. Sajaba dueg, Luh Puji masih olas tekén tiang. Ia ané demen nraktir tiang mablanja ngajahin tiang ngajeng dedaaran ané tawah-tawah ngajeng spageti, humberger lan piza. Mirib suba liu dedaaran ané jaen-jaen bakat ajenga ngantos ia nyemak gegaen ngajeng ubad legu. Mirib suba wadih.

Kari inget tiang tuturne Luh Puji ring media sosial. Iraga patut bangga dadi anak luh. Ring dija anak luh kajungjung irika para dewatane pacang seneng. Ring dija anak luh katundung, nenten wenten yadnya sane mapikolihin. Keto Luh Puji ngambil kecapin sastra Manawa Dharmasastra angge pamanis tuturne. Nanging tiang ten uning napi mawinan kruna punika kadi nenten mabuat ring parilaksanane. Tuturne buka luntur. Mirib kaliwat sebet kenehne, mameteng tusing nyingakin galang.

Tiang tusing percaya yen anake nyambatang ia buduh. Tiang dot nawang napi kasujatiané Luh Puji dados ngemasin mati. Ipidan kirang langkung 3 bulan ané liwat, galah tiang macunduk si duri sareng Luh Puji. Kabenéngan Luh Puji ngundang tiang ring acara Grand Opening warung babi gulingné. Kabenéngan masih tiang polih tugas ngaliput berita saking kantor. Ditu tiang macunduk sareng Gus Adi, kurenan Luh Puji. Sambil masalaman inget tiang dugasé masekolah. Gus Adi niki mula idaman tiang sareng anak luh lianan. Ia dadi ketua Osis tur dadi pemain basket. Mula pantes Gus Adi masanding sareng Luh Puji. Pada-pada dueg, jegég lan bagus.

Luh Puji nyemak liman tiang ngajakin tiang lakar wawancara. Ditu ia ngemang tiang flasdisk ané misi video-video sareng foto ia dadi pembicara seminar. Kadi biasa ia liu nuturin tiang indik kautaman dadi anak luh. Apang bisa berpikir maju, napimalih mangkin jaman émansipasi wanita. Tiang ningehang makejang munyiné sambilang tiang nyatet. Cingakin tiang masih limané Luh Puji rikala nuturin tiang. Jriji tengebotné nyepit roko sané siupa salegenti sareng cocktail di lima tengawané. Ada tatu ané orange kena tiuk rikala ngoot bawang. Soleh tatuné di pegelangan lima tengawané.

Ring acara paleboné kisi-kisi pirengin tiang Luh Puji orahanga buduh. Jiwa wartawan tiange pesu, paekin tiang suara punika saha ngumpulang informasi. Tangkejut tiang nika saking Tu Biang Sari, matuané Luh Puji. Nika raris tiang mireng Luh Puji sampun makelo gelem inguh bayuné kebyat-kebyut. Dikénkéné pirenga Luh Puji kedék ngakak, dikénkéné ngeling. Di ngentah gelemné ia tusing nyak paekin sajaba dokter pribadiné. Kapah ia polih nutur sareng rerama, tur tusing bisa tedun mabanjar. Tiang dot nékedang napi mawinan Luh Puji nénten kapreksa ka rumah sakit jiwa nanging tiang uning pidan Luh Puji mula nénten katrima ring gria.

Ngejer liman tiangé sambilang ngetelang yeh mata rikala nulisin berita indik kematian Luh Puji. Marawat kenangan tiangé pidan sambilang muka folder ané misi video motivasi saking Luh Puji, wenten masih foto kenangan dugas tiang SMA. Tusing madaya timpal ané satata nuturin tiang ngelah masalah ane makada ia buduh. Foto Luh Puji, tiang sareng Gus Adi rikala perpisahan enu kari masimpen ring folderné Luh Puji.

Sujatiné Luh Puji buduh ulian ipun stress. Gus Adi ané nuturang unduke punika satonden ipun berangkat ke Jakarta. Luh Puji orahanga tusing bisa ngajinin kurenan, satata sibuk ring urusan pribadi. Engsap ring kodratné dadi anak luh apang bisa ngayahin kurenan. Apabuin suba makelo Luh Puji tusing ngidang micayang prati sentana.

Uli ditu mara rasayang tiang nasib Luh Puji tusing sanget melahan tekén tiang. Ia buka kedis dara ané makurung di sangkar emas. Ngenah bagia nanging sujatiné ia sebet. Liu sebetné ané engkebanga saking kurenan, saking matua, taler saking tiang. Lemet bayun tiange rikala mukak folder ané matulisan rahasia. Ditu Luh Puji ngae video unduk rasa ane karasayang. Wenten video ipun egar makenyem ngucapang wanti warsa sareng Gus Adi. Wenten video ipun luas maplesiran ke Jepang.

Buka ujan aine, buin galang, buin gulem keto ane rasayang rikala nyingakin videone ipun ngeling sigsigan tur nuturang indik tresnane sareng Gus Adi. Tresna sane nenten paripurna. Luh Puji nyambat adan tiang tumuli matbat-matbat. Gedegne kalintang sareng tiang. Gus Adi kocap ngelah tresna sareng tiang. Tresna ane ngaenang Luh Puji tusing marasa dadi nomer satu di ati kurene. Kablengek tiang mapangsegan di kursine. Tusing sida tiang ngundukang keneh tiange mangkin. Tonden telah eling tiang. Saget wenten telpon saking dokter pribadine Luh Puji. Irika tiang tuturina Luh Puji kena penyakit mental ane kabaos Gangguan Bipolar.